Plantun de Prouvènço

Pèr coumpara dos planto d'encò nostre

Arenaria leptoclados & Aegilops cylindrica

Arenaria leptoclados

Caryophyllaceae

Nom en français : Sabline à rameaux fins.

Descripcioun :
Aquesto pichoto lineto èi proun coumuno dins li roucaio de nòsti colo. Se recounèis à si flour qu'an de petalo mai courto que li sepalo. Èi pas toujour eisa de la destria de sa cousino la lineto-di-fueio-de-serpoulet, Arenaria serpyllifolia ; aquesto radiero trachis dins li relarg mens secarous e se recounèis à si grano pu grosso (> 0,5 mm - eici < 0,5 mm) e à si fru pu boumbu e pu souplo.

Usanço :
Parèis que li japounés la manjon, cuecho, en soupo o en tian.

Port : Erbo
Taio : 2 à 20 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Arenaria
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 1,5 à 2 mm
Flourido : Printèms

Sòu : Ca
Autour basso e auto : 0 à 1200 m
Aparado : Noun
Mai à jun

Liò : Roucaio - Tepiero seco - Sablo
Estànci : Termoumediterran à Mountagnard
Couroulougi : Paleoutemperado
Ref. sc. : Arenaria leptoclados (Rchb.) Guss., 1844 (= Arenaria serpyllifolia subsp. leptoclados (Rchb.) Nyman, 1878 )

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.